U21: საქართველო ბათუმში ნიდერლანდებთან დამარცხდა
ევროპის 21-წლამდელთა ჩემპიონატის საკვალიფიკაციო ეტაპზე საქართველოს ნაკრებმა მე-3 ტურის შეხვედრაში ნიდერლანდებს უმასპინძლა და 0:3 დამარცხდა.
რამაზ სვანაძის გუნდმა შეხვედრა აქტიურად დაიწყო და საგოლე მომენტებიც შექმნა. გატანაც მართებდათ, თუმცა დამაგვირგვინებელ ფაზაში სცოდავდნენ.
სტუმრებმა 26-ე წუთზე კარში პირველად დაარტყეს და გაიტანეს. მეიერმა ანგარიში გახსნა და ტაიმის მიწურულს 46-ე წუთზე მეორეც გაიტანა.
მეორე ტაიმში ნოა ოჰიომ 57-ე წუთზე მესამეც გაიტანა და შეხვედრას წერტილი დაუსვა.
ქართველმა ფეხბურთელებმა მომენტები მეორე ტაიმშიც შექმნეს, თუმცა ბოლო მომენტში საშემსრულებლო ოსტატობა დააკლდათ.
ამრიგად, ნიდერლანდებმა ჯგუფში ერთპიროვნული ლიდერის სტატუსი მოიპოვა და 9 ქულა დააგროვა. საქართველო კი 6 ქულით მეორეა. მომდევნო შეხვედრაში 17 ოქტომბერს სვანაძის გუნდი შვედეთს უმასპინძლებს.
შეგახსენებთ, რომ ჯგუფიდან საუკეთესო მეორეადგილოსნები გადიან. საქართველო ჯერჯერობით კარგ შანსს ინარჩუნებს.
