ფ1-ის წლევანდელი სეზონი როსბერგის გამარჯვებით დასრულდა

მაშ ასე, დასრულდა ფორმულა 1-ის 2015 წლის ჩემპიონატი. აბუ დაბის დიდი პრიზი ბევრს აღარაფერს წყვეტდა, მაგრამ ის ისეთივე დაძაბული და საინტერესო გამოდგა, როგორიც სეზონის გამხსნელი, მელბურნის რბოლა იყო. რა თქმა უნდა, გამარჯვებისთვის „მერსედესის“ პილოტებმა იბრძოლეს და ამჯერადაც ნიკო როსბერგმა პირველმა გადაკვეთა ფინიშის ხაზი. ჩემპიონი ლუის ჰამილტონი კი კვლავ მეორე ადგილს დასჯერდა. თუმცა, ნარბოლევს მარცხი ისევ გუნდის არასწორ ტაქტიკას დააბრალა.

როსბერგმა სტარტზევე შეინარჩუნა მოწინავე პოზიცია და ის მხოლოდ ორჯერ დაკარგა, მხოლოდ მაშინ, როცა პიტ სტოპებს ასრულებდა. მის ლიდერობას ბოლომდე საფრთხე არ შექმნია. ჰამილტონმა რა თქმა უნდა, არ ისურვა უბრძოლველად დანებება, მაგრამ მეორე პიტ სტოპზე გუნდმა ძალიან გვიან იხმო და ამის შემდეგ, როსბერგის დაწევა შეუძლებელი გახდა.

ასეა თუ ისე, „მერსედესმა“ ამ სეზონში 19-დან 16 რბოლა მოიგო. დანარჩენი ორი სებასტიან ფეტელის და მისი „ფერარის“ ანგარიშზეა. ჰამილტონმა ასეც ვერ მოახერხა ამ სეზონშივე 44-ე გამარჯვების მოპოვება. სამქიმიანებმა დუბლით მე-12 რბოლა მოიგეს. როსბერგმა კი ზედიზედ მესამე, სეზონში მეექვსე და კარიერაში მე-14 გამარჯვება იზეიმა და იმედი აქვს, რომ მომავალ სეზონსაც გამარჯვებით დაიწყებს.

„ოსტინში ძნელი რბოლის შემდეგ, გაცილებით უკეთ ვასპარეზობ და შედეგებიც სახეზეა. სეზონის დასასრულით კმაყოფილი ვარ და ვისურვებდი, რომ შემდეგი სეზონი ხვალვე იწყებოდეს. არანაირი არდადეგები არ მჭირდება“, - ამბობს როსბერგი, ვინც შამპანურის ნაცვლად, თავისი გამარჯვება ვარდის წყლის შხაპით იზეიმა - ემირატებში, სადაც ქვეყნის დაარსებიდან 44 წლის იუბილეს აღნიშნავენ, ალკოჰოლის რეკლამირება მიუღებელია.

ჰამილტონმა ფინიშამდე 15 წრით ადრე, თავის ინჟინრებს რადიოთი ჰკითხა, შეეძლო თუ არა, რბოლის ბოლომდე ძველ საბურავებზე დარჩენა. მაგრამ უპასუხეს, რომ ეს მეტისმეტი რისკი იქნებოდა. ერთი წრის შემდეგ კი პიტლეინზე უხმეს. ტრასაზე დაბრუნებულს, თავიდან ისეთი ტემპი ჰქონდა, რომ ბოლო წრეზე უნდა დასწეოდა თანაგუნდელს, მაგრამ ფინიშიმდე სამი წრით ადრე აშკარა გახდა, რომ როსბერგის ლიდერობას ხიფათი აღარ ელოდა.

მესამე ადგილი კიმი რაიკონენმა დაიკავა, მეოთხეზე კი მისი თანაგუნდელი ფეტელი გავიდა, რომელმაც რბოლა მე-15 პოზიციიდან დაიწყო. ფინელი მრბოლისთვის ეს ამ სეზონში მესამე კვარცხლბეკია.

აბუ დაბის დიდი პრიზი

აბუ დაბი. იას მარინა, დისტანცია 305.355 კმ (55 წრე, 5.554 კმ)