10-კაციან მონაკოსთან დამარცხდნენ | პსჟ-ს მესამე მარცხი სეზონში

საფრანგეთის ლიგა 1-ში სებასტიან პოკონიოლის გაწვრთნილმა „მონაკომ’’ შინ პსჟ-ს 1:0 მოუგო, პირველი ტაიმი უგოლოდ დასრულდა, 68-ე წუთზე ტაკუმი მინამინომ გამარჯვების გოლი შეაგდო. მე-80 წუთზე „მონაკოს'' მცველმა ტიმო კერერმა წითელი ბარათი მიიღო, თუმცა პსჟ-მ დარჩენილ დროში რიცხვობრივი უპირატესობა ვერ გამოიყენა.

მატჩის დასაწყისში ხვიჩა კვარაცხელია პასიური იყო, თუმცა შემდეგ გააქტიურდა, ლუის ენრიკეს გუნდის შეტევებს სიმწვავე შესძინა. მისი დღევანდელი თამაშიდან რამდენიმე მომენტია გამოსარჩევი. ქართველი შემტევი 76-ე წუთზე შეცვალეს.

 

პსჟ-ს შემტევითი ტრიო ასეთი იყო: კვარაცხელია (მარცხნიდან), სენი მაიულუ (ფორვარდად) და კამგ ინ-ლი (მარჯვნიდან). ბრედლი ბარკოლა და უსმან დემბელე სათადარიგოთა სკამზე ისხდნენ.

პსჟ მიმდინარე სეზონში მესამედ დამარცხდა, ლიგა 1-ში „მარსელთან'' და „მონაკოსთან'' გასვლითი მატჩები იდენტური ანგარიშით დათმო, ჩემპიონთა ლიგაზე კი საკუთარ მოედანზე „ბაიერნთან'' დაკარგა 3 ქულა (2:3).

14 ტურში პსჟ-მ 30 ქულა დააგროვა, „მარსელსა’’ და „ლანსს’’ 2 ქულით უსწრებს, თუმცა აღნიშნულ გუნდებს ჯერ მიმდინარე ტურში არ უთამაშიათ, ლიდერთან შედარებით ერთით ნაკლები მატჩი გამართეს. ლიგა 1-ის მომდევნო ტურში, 6 დეკემბერს პსჟ „რენს’’ მიიღებს.

ქართველმა ფეხბურთელმა ლიგა 1-ის მიმდინარე სეზონში 12 მატჩში 1 გოლი გაიტანა და 3 საგოლე პასი შეასრულა. რაც შეეხება ჩემპიონთა ლიგას, ოთხ მატჩში მის აქტივში 2 გოლი და 3 საგოლე გადაცემაა.