ლებრონი გააბრაზეს - "მეფის" მეფური სტატისტიკა და ახალი რეკორდი!
გამთენიისას ნაციონალური საკალათბურთო ასოციაციის მორიგი ტურის შეხვედრები გაიმართა. დიდ ინტერესს იწვევდა ვაშინგტონში ადგილობრივი "ვიზარდსისა" და "კლივლენდის" დაპირისპირება, რომელიც სტუმართა გამარჯვებით 130-122 დასრულდა.
NBA-ს ვიცე ჩემპიონმა სეზონი ძალიან არადამაჯერებლად დაიწყო. "კავალიერსს" 8 მატჩში 5 მარცხი და მხოლოდ 3 გამარჯვება ჰქონდა.
"ვიზარდსის" წინააღმდეგ შეხვედრაში, როგორც ჩანს ძალიან გაბრაზებული და მოტივირებული იყო ლებრონ ჯეიმსი, რომელმაც პარკეტზე 43 წუთი გაატარა, რა დროშიც მან 57 ქულა, 11 მოხსნა, 7 გადაცემა, 3 ჩაჭრა და 2 დაფარება ჩაიწერა აქტივში.
"მეფე" შთამბეჭდავად გამოიყურებოდა და მისი შეჩერება ვერავინ მოახერხა. ლებრონმა ამ შეხვედრის შემდეგ რეკორდიც დააფიქსირა. ჯეიმსი გახდა ყველაზე ახალგაზრდა მოთამაშე, რომელმაც 29 000 ქულის ჩაგდება შეძლო.