55 უნებლიე შეცდომა - ბასილაშვილი ავსტრალიის ღია პირველობას გამოეთიშა

ნიკოლოზ ბასილაშვილი ავსტრალიის ღია პირველობას გამოეთიშა. ქართველი ჩოგბურთელი ტურნირის პირველივე წრეში დამარცხდა და მსოფლიოს მე-9 ჩოგნის, ტეილორ ფრიცის წინააღმდეგ 4 სეტში წააგო - 4:6, 2:6, 6:4, 5:7.

მატჩი ბასილაშვილის უპირატესობით დაიწყო და მე-3 გეიმში, ნიკამ ბრეიკი შეასრულა, რასაც მოგებული ჩაწოდება მიაყოლა და 3:1 დაწინაურდა. სამწუხაროდ, ქართველმა უპირატესობა ვერ შეინარჩუნა და მომდევნო 6 გეიმიდან მხოლოდ 1 აიღო. მეორე პარტიის სტარტიც თანაბარი იყო და ჩოგბურთელებმა 2-2 გეიმი გაცვალეს. 3:2-ზე, ფრიცმა ბრეიკი შეასრულა, საქმე ბოლომდე მიიყვანა და სეტებში 2:0 დაწინაურდა.

ბასილაშვილმა მე-3 პარტია მაღალ დონეზე ჩაატარა და თამაშში დაბრუნდა. ნიკამ პირველივე გეიმში მეტოქის ჩაწოდება აიღო, ფრიცისთვის ბრეიკპოინტი არ მიუცია და ჩამორჩენა შეამცირა - 1:2. მე-4 სეტში, 5:4-ზე ფრიცს მატჩბოლი ჰქონდა, რომელიც ვერ გამოიყენა, თუმცა 6:5-ზე შანსი ხელიდან აღარ გაუშვია და მომდევნო ეტაპზე გავიდა.

ცნობისთვის, ბასილაშვილის მეტოქის ჩაწოდებასთან გამკლავება ძალიან გაუჭირდა და ფრიცმა 32 ეისი შეასრულა. ნიკოლოზს 9 ეისი ჰქონდა, თუმცა 11 ორმაგი და 55 უნებლიე შეცდომა დაუშვა, როცა ფრიცი ჩაწოდებაზე მხოლოდ 2-ჯერ, ხოლო თამაშისას 27-ჯერ შეცდა.