სერბული პრესა: „ცრვენა ზვეზდა აზაროვის სანაცვლოდ 300 000 ევროს გადაიხდის“
„დინამო ბათუმის“ მარცხენა მცველი, ირაკლი აზაროვი კარიერას „ცრვენა ზვეზდაში“ გააგრძელებს. ამაზე აქტიურად იწერება და დღეს, სერბულ პრესაში ტრანსფერთან დაკავშირებით, ახალი ინფორმაცია გავრცელდა.
Sportski-ს ცნობით, ბელგრადული კლუბი აზაროვის სანაცვლოდ 300 000 ევროს გადაიხდის. ამასთან, მისი გასხვისების შემთხვევაში, „ცრვენა ზვეზდას“ მოუწევს, მიღებული თანხის 20 პროცენტი „დინამო ბათუმს“ გადასცეს. Sportski-ს თუ დავუჯერებთ, ტრანსფერი ოფიციალურად დღეს უნდა გამოცხადდეს.
გეტყვით იმასაც, რომ TVarenasport-ის მიხედვით, ცრვენა ზვეზდას გარდა, აზაროვის გაფორმებით იტალიური კლუბი ინტერესდებოდა. არჩევანი თავად ფეხბურთელმა გააკეთა და ყველაფრიდან გამომდინარე, უპირატესობა სერბეთის ჩემპიონის რიგებში თამაშს მიანიჭა, რომელიც ჩემპიონთა ლიგის ჯგუფურ ეტაპზე მოსახვედრად იბრძვის.
შეგახსენებთ, რომ ირაკლი აზაროვი თბილისის „დინამოს“ აკადემიის აღზრდილია, ბოლო წლებში კი ბათუმის „დინამოში“ გამოდიოდა. გია გეგუჩაძის გუნდში ახალგაზრდა ფეხბურთელმა 65 მატჩი ჩაატარა, სადაც 4 გოლითა და 10 საგოლე გადაცემით გამოირჩა.
