გოგა ინდიანას დაუბრუნდა - 5 ქულა, 2 მოხსნა და 3 დაფარება ნიქსის წინააღმდეგ
გოგა ბითაძის „ინდიანა პეისერსის“ 2-შეხვედრიანი წაუგებელი სერია „ნიუ იორკ ნიქსთან“ შეწყდა. ქართველი კალათბურთელის გუნდმა მატჩის საწყისი 3 მეოთხედი კარგად ჩაატარა და ბოლო თორმეტწუთეულს 5-ქულიანი უპირატესობით შეხვდა, თუმცა გადამწყვეტი პერიოდი 10-23 წააგო და საბოლოოდ, 84-92 დამარცხდა.
ბითაძე, რომელმაც „ფილადელფიასთან“ გამართული მატჩი ავადმყოფობის გამო გამოტოვა, გუნდს დაუბრუნდა და პარკეტზე 16 წუთი და 29 წამი გაატარა. ამ დროში, გოგამ 5 ქულა, 2 მოხსნა (ერთი მეტოქის ფარზე), 1 ჩაჭრა და 3 დაფარება მიითვალა. ქართველმა კალათბურთელმა 2-დან 2 ორქულიანი ჩააგდო, 1 საჯარიმო გამოიყენა, 3 სამქულიანი გააცუდა, ბურთი არ დაუკარგავს და არც პერსონალური ფოლი მიუღია.
???? these are two BIG MEN, y'all#GoldBlooded pic.twitter.com/nEH67bbvGa
— Indiana Pacers (@Pacers) November 16, 2021
„ინდიანას“ რიგებში ყველაზე მეტი, 22 ქულა მალკოლმ ბროგდონმა ჩააგდო. დომანტას საბონისს 21 ქულა და 15 მოხსნა ჰქონდა, ხოლო კარის ლევერტმა მატჩი 17 ქულით დაასრულა. „ნიუ იორკს“ 16-16 ქულით უოკერმა და ქუიკლიმ ულიდერეს. დერიკ როუზს 14 ქულა ჰქონდა, ხოლო ჯულიუს რენდლი 11 ქულას დასჯერდა.
შეგახსენებთ, რომ „ინდიანას“ 6 მოგება და 9 წაგება აქვს და სატურნირო ცხრილის მე-12 პოზიციას იკავებს. „პეისერსი“ მომდევნო შეხვედრას „დეტროიტთან“ გამართავს და „პისტონსს“ 18 ნოემბერს დაუპირისპირდება.
