4 მატჩი 7 დღეში - შენგელია მსოფლიო ჩემპიონატის საკვალიფიკაციო ეტაპზე ითამაშებს
რუსული გამოცემები იუწყებიან, რომ ცსკა-ს ქართველი კალათბურთელი, თორნიკე შენგელია 2023 წლის მსოფლიო ჩემპიონატის საკვალიფიკაციო ეტაპის ეგიდით გასამართ მატჩებში მონაწილეობას მიიღებს. ნოემბრის ბოლოს, საქართველოს საკალათბურთო ნაკრებს ორი შეხვედრა ელის და დიდი ალბათობით, გუნდის ერთ-ერთ ლიდერთან ერთად იასპარეზებს.
თუ თოკომ უკრაინასთან და ესპანეთთან ჩანიშნული მატჩები არ გამოტოვა, 7 დღეში 4 შეხვედრის ჩატარება მოუწევს. 25 ნოემბერს, ცსკა ევროლიგაზე „ბაიერნს“ ეთამაშება, 26-ში საქართველო-უკრაინის დაპირისპირებაა ჩანიშნული. 29-ში ჩვენი მეტოქე ესპანეთი იქნება, ხოლო 2 დეკემბერს ცსკა „პანათინაიკოსს“ გაეჯიბრება.
შეგახსენებთ, რომ შენგელიამ მიმდინარე სეზონი შესანიშნავად დაიწყო და ევროლიგის ტურის საუკეთესო მოთამაშედ ზედიზედ 2-ჯერ დაასახელეს. „ეფესთან“ შეხვედრაში თოკომ გუნდს 23 ქულა, 4 მოხსნა და 3 ასისტი მოუტანა, „ზენიტთან“ კი თავი 33 ქულას, 8 მოხსნას და 2 შედეგიან გადაცემას მოუყარა.
შენგელიას წარმატებული ასპარეზობა მხრის ტრავმამ შეწყვიტა, რომლის მოსაშუშებლად მინიმუმ ორი თვე უნდა ყოფილიყო საჭირო, თუმცა მკურნალობის პროცესი მოსალოდნელზე ბევრად კარგად წარიმართა და საქართველოს ნაკრების კაპიტანი პარკეტს დაუბრუნდა.