მამუკელაშვილი მინესოტაში ივარჯიშებს - მას NBA-ის 30-ვე გუნდი დააკვირდება
8 ივლისიდან 11 ივლისამდე, მინესოტაში Minnesota Group Workout გაიმართება, რომელზეც NBA-ის გუნდები დრაფტის წინ, ახალგაზრდა კალათბურთელებს დააკვირდებიან. ღონისძიებას „მინესოტა ტიმბერვულვზი“ უმასპინძლებს და 4 დღის განმავლობაში გამართული ვარჯიშები ყველა გუნდისთვის ღია იქნება.
რამდენიმე საათის წინ, ცნობილი გახდა იმ კალათბურთელთა ვინაობა, რომლებიც ვარჯიშებში მონაწილეობას მიიღებენ. ESPN-ის მიხედვით, ორგანიზატორების მიწვევაზე ჯერჯერობით თანხმობა 39-მა ახალგაზრდამ განაცხადა და ერთ-ერთი მათგანი ქართველი კალათბურთელი, სანდრო მამუკელაშვილია.
People will note that there are several players who are still testing the NBA Draft waters and that this workout is scheduled for after the NCAA withdrawal deadline. I wouldn't read too much into that. Some players (testing or not) will likely withdraw and be replaced by others. https://t.co/PG9ClIeWvg
— Jonathan Givony (@DraftExpress) July 2, 2021
„მამუს“ კარგი შანსი ექნება, NBA-ის გუნდებზე შთაბეჭდილება მოახდინოს. თანაც, როგორც აღვნიშნეთ, ვარჯიშები 30-ვე გუნდისთვის ღია იქნება და ეს სანდროსთვის დამატებითი მოტივაციაა.
შეგახსენებთ, რომ 21-დან 27 ივნისამდე ჩიკაგოში Microsoft Surface Draft combine გაიმართა და მამუკელაშვილმა ექსპერტებისგან და ანალიტიკოსებისგან საქებარი სიტყვები დაიმსახურა. უცხოური გამოცემები ვარაუდობენ, რომ სანდროს მეორე რაუნდში აირჩევენ და მას „ბრუკლინ ნეთსს“, „დეტროიტ პისტონსს“, „ნიუ იორკ ნიქსსა“ და სხვა გუნდებს უკავშირებენ.
