მეკარის საგოლე პასი - რუი სილვამ 14-წლიანი შედეგი გაიმეორა
ევროპა ლიგის პირველ მერვედფინალურ მატჩში „გრანადამ“ ნორვეგიულ „მიოლდეს“ 2:0 მოუგო. შეხვედრაში ისეთი ფაქტი მოხდა, რაც ამ ტურნირზე ესპანური გუნდისთვის 2007 წლის შემდეგ არ იყო დაფიქსირებული.
კერძოდ, გრანადელთა მეკარე რუი სილვამ 26-ე წუთზე თანაგუნდელ ხორხე მოლინაზე საგოლე გადაცემა გააკეთა. პორტუგალიელმა გოლკიპერმა უბრალოდ თავისუფალი დარტყმა შეასრულა, რასაც სკანდინავიელთა მცველების დაბნევა და მოლინას ერთი-ერთზე დარჩენა მოჰყვა, დანარჩენი უკვე ტექნიკის საქმე გახლდათ.
1 - Rui Silva ???????? is the first keeper to deliver an assist for a Spanish team in UEL/UEFA CUP since Andrés Palop for @SevillaFC_ENG vs Espanyol in the 2006/07 Final at Hampden Park. Wisdom@GranadaCF_en#UEL pic.twitter.com/G0ee0q9ulB
— OptaJose (@OptaJose) March 11, 2021
სილვამდე ევროპის რანგით მეორე საკლუბო ტურნირზე ესპანური კლუბის მეკარეთაგან საგოლე პასი ანდრეს პალოპმა შეასრულა. მან 2007 წლის უეფა-ს თასის ფინალისას ხელით ასისტი ადრიანო კორეიაზე მიითვალა.
აღსანიშნავია, რომ იმ სეზონის უეფა-ს თასზე პალოპმა გოლიც გაიტანა. მან „სევილია“ გავარდნას 1/16 ფინალში გადაარჩინა, როცა დონეცკის „შახტარს“ ბოლო წუთებზე თავით გაუტანა.
„გრანადამ“ „მიოლდესთან“ მოპოვებული 2-ბურთიანი სხვაობით გამარჯვებით, 1/4 ფინალისკენ სოლიდური ნაბიჯი გადადგა. ისიც არ დაგვავიწყდეს, რომ ეს ანდალუსიელთა პირველი ევროსეზონია.
გუნდებს შორის საპასუხო შეხვედრა ერთი კვირის თავზე, 18 მარტს, უკვე ნორვეგიაში გაიმართება.