1950 წლის შემდეგ პირველად - ლუკაკუმ 71-წლიანი რეკორდი გაიმეორა
იტალიის სერია A-ს 23-ე ტურის ეგიდით გამართული „დერბი დელა მადონინა“ „ინტერის“ დამაჯერებელი გამარჯვებით დასრულდა. „ნერაძურიმ“ თანაქალაქელ „მილანს“ ლაუტარო მარტინესის დუბლითა და რომელუ ლუკაკუს გოლით - 3:0 მოუგო.
„შავ-ლურჯთა“ ბელგიელმა თავდამსხმელმა ზედიზედ მე-4 მილანურ დერბიში გაიტანა და ბენიტო ლორენცის 71-წლიანი რეკორდი გაიმეორა. 1950 წლის შემდეგ ლუკაკუ „ინტერის“ პირველი ფეხბურთელია, რომელმაც მიჯრით ოთხ „დელა მადონინაში“ შეაგდო.
4 - Prior to Romelu Lukaku, the last Inter player to score in four consecutive Milan derbies in Serie A was Benito Lorenzi, in 1950. Poison.#MilanInter #DerbyMilano pic.twitter.com/mAE9AoTBFp
— OptaPaolo (@OptaPaolo) February 21, 2021
27 წლის ფორვარდმა გუშინდელი მატჩისას საგოლე გადაცემაც შეასრულა. ლაუტარომ ანგარიში სწორედ მისი გამოზომილი ჩაწოდების შემდეგ გახსნა. ზოგადად, ლუკაკუ მიმდინარე ჩემპიონატის საუკეთესო ბომბარდირია - იგი კრიშტიანუ რონალდუს 1 ბურთით უსწრებს.
„ინტერმა“ სერია A-ს სატურნირო ცხრილში ლიდერობა განიმტკიცა და იმავე „მილანს“ უკვე 4 ქულით გაუსწრო. ანტონიო კონტეს გუნდი მომდევნო ტურში კარგ ფორმაში მყოფ „ჯენოას“ უმასპინძლებს.
