გეგა გეგეშიძე ჭიდაობის ეროვნული ფედერაციის პრეზიდენტად მეორე ვადით აირჩიეს
საქართველოს ჭიდაობის ეროვნული ფედერაციის პრეზიდენტად მეორე ოთხწლიანი ვადით გეგა გეგეშიძე იქნა არჩეული.
5 დეკემბერს, ვაკის ფალავანთა კლუბში გამართულ საანგარიშო-საარჩევნო ყრილობაზე პრეზიდენტობის ერთადერთი კანდიდატი ვიხილეთ, რომელსაც მხარი ფარულ კენჭისყრაში ხმის უფლების მქონე ოცდაათივე დელეგატმა დაუჭირა.
„დიდი მადლობა დელეგატებს, რომლებმაც პრეზიდენტად მეორე ვადით ამირჩიეს. ძალიან კარგი 4-წლიანი ციკლი ჩავატარეთ, 4 მოქმედი მსოფლიო ჩემპიონი გვყავს, გვყავდა პრიზიორი ქალთა შეჯიბრებაში ევროპის პირველობაზე, რაც აქამდე არ მომხდარა.
ჩვენი მიზანია, რომ მომდევნო 4 წელიწადში ქვეყანა უფრო მეტად ვასახელოთ და უკეთესი შედეგები ვაჩვენოთ.
ეს ყველაფერი გახლავთ სპორტის სამინისტროს, ოლიმპიური კომიტეტისა და სახელმწიფო სტრუქტურების თანადგომის შედეგი“. - განაცხადა გეგა გეგეშიძემ არჩევნების შემდეგ.
