მამუკელაშვილის სუპერ მატჩი და 25 ქულა - სეტონ ჰოლი მეორედ დამარცხდა
სანდრო მამუკელაშვილის „სეტონ ჰოლი“ მიმდინარე სეზონში მეორედ დამარცხდა. „მეკობრეებმა“ სტუმრად „როდ აილენდის“ წინააღმდეგობა ვერ დაძლიეს და 13 ქულით, 76-63 წააგეს.
ქართველმა მძიმე ფორვარდმა ბრწყინვალე მატჩი ჩაატარა და ორივე გუნდის რიგებში საუკეთესო იყო. „მამუმ“ 38 წუთი ითამაშა, ორმაგი დუბლი გაიფორმა და 25 ქულას, 10 მოხსნას, 2 ასისტს და 1 ჩაჭრას დასჯერდა.
CALL IT THE MAMU SPECIAL!
— #BIGEASThoops (@BIGEASTMBB) December 3, 2020
What a finish from @Mamukelashvili5. #HALLin x #BIGEASThoops pic.twitter.com/WbanIQhDUV
მამუკელაშვილმა პარკეტიდან 17-დან 8 ბურთი ჩააგდო, 8-დან 4 სამქულიანი მიითვალა და 9-დან 5 საჯარიმო გამოიყენა. სანდროს გარდა, „სეტონ ჰოლის“ რიგებში 10-ქულიანი ნიშნული მხოლოდ ჯარედ როდენმა გადალახა და აქტივში ზუსტად 10 ქულა, 6 მოხსნა და 2 ასისტი ჩაიწერა.
MAMU TAKEOVER!
— CBS Sports Network (@CBSSportsNet) December 3, 2020
Sandro Mamukelashvili continues to dominate for the Pirates, extending Seton Hall's lead. pic.twitter.com/2tNxzIzqcE
მატჩის შემდეგ, „მეკობრეების“ თავკაცმა, კევინ უილარდმა მამუკელაშვილის შესახებ მოკლედ ისაუბრა და განაცხადა: „არ მგონია, რომ სანდრომ კარგად იასპარეზა, თუმცა ასე იმიტომ ვფიქრობ, რომ მისგან გაცილებით მეტს ველი, რადგან იგი ქვეყანაში ერთ-ერთ საუკეთესო კალათბურთელია. ჩემი აზრით, მან უფრო მშვიდად უნდა ითამაშოს. ხანდახან იგი ძალიან ჩქარობს და ეს ბუნებრივიცაა, რადგან ახლა მას შეტევაში გაცილებით მეტის შექმნა ევალება. შარშან ყველაფერი სხვანაირად იყო და ამის გამოსწორებას გარკვეული დრო დასჭირდება“.
"They Can't Stop Him!" @Mamukelashvili5 has 16 for @SetonHallMBB after the game-tying 3⃣. #HALLin x #BIGEASThoops pic.twitter.com/R9ynoJC9AP
— #BIGEASThoops (@BIGEASTMBB) December 3, 2020
„სეტონ ჰოლის“ ანგარიშზე 2 წაგება და 1 მოგებაა. „მეკობრეები“ მომდევნო შეხვედრას თბილისის დროით 5 დეკემბერს გამართავენ და საკუთარ კედლებში „ორეგონს“ დაუხვდებიან.