საქართველოს ნაკრებს ფიჯისთან მატჩში გორგაძე და ხმალაძე ვერ დაეხმარებიან
Aa
Aa

საქართველოს ნაკრებს ფიჯისთან მატჩში გორგაძე და ხმალაძე ვერ დაეხმარებიან

შემოდგომის ერთა თასის დასკვნით მატჩში, „ბორჯღალოსნებს“ ბექა გორგაძე და ლაშა ხმალაძე დააკლდებათ. საქართველო 5 დეკემბერს, ჩვენი დროით 16 საათზე ფიჯის ედინბურგში მე-7 ადგილისთვის შეერკინება.

24 წლის გორგაძემ, რომლის ანგარიშზე 31 კეპია, მუხლი კვირას, ირლანდიასთან დაიზიანა. ბორჯღალოსნების მთავარი მწვრთნელი ლევან მაისაშვილი იმედოვნებს, რომ ბექა საოპერაციო არ გახდება:

„გორგაძეს დღეს (ოთხშაბათს) სურათს გადაიღებს და ტრავმის სიმძიმე და ხარისხი ამის შემდეგ გვეცოდინება. ამ ეტაპზე დანამდვილებით შეიძლება ითქვას, რომ ის ფიჯისთან ვერ ითამაშებს. იმედს ვიტოვებ, დაზიანება იმ დონის არ იქნება, რომ ბექას ოპერაცია დაჭირდეს და დიდი დრო გაუცდეს“.

ფეხის კუნთი აწუხებს და დიდი ალბათობით ვერ ითამაშებს ლაშა ხმალაძე, რომელმაც ამავე მიზეზით ირლანდიასთან მატჩიც გამოტოვა. თავს უკეთ გრძნობს მეორეხაზელი კოტე მიქაუტაძე. მან ნეკნი 21 ნოემბერს, უელსთან მატჩის პირველ ტაიმში დაიზიანა: „კოტემ ივარჯიშა და ოთხშაბათს გვეცოდინება ბოლომდე შეძლებს თუ ვერა თამაშს. არის წვრილ-წვრილი ტრავმებიც, თუმცა სხვა შემთხვევებში საშიში არაფერია“ – ამბობს მაისაშვილი.

მომზადებულია rugby.ge-ის მიხედვით.

 

მსგავსი სიახლეები

ცხელი ამბები