ინტერის ისტორიაში მე-4 - ლუკაკუ რონალდოს, მილიტოსა და სოსას გვერდით
პანდემიის შემდეგ პირველი მატჩი მოიგო მილანის „ინტერმა“, რომელმაც სერია A-ს ეგიდით „სამპდორიას“ 2:1 აჯობა. კონტეს გუნდის მხრიდან გოლები ლუკაკუმ და ლაუტარო მარტინესმა გაიტანეს.
ბელგიელმა ფორვარდმა ამ გოლით გამორჩეული მაჩვენებელიც დააფიქსირა და „ნერაძურის“ ისტორიაში შევიდა. ლუკაკუ მე-4 ფეხბურთელია, რომელმაც „შავ-ლურჯების“ მაისურით ჩატარებულ პირველსავე სეზონში 18 ან მეტი გოლი გაიტანა. აქამდე ასეთი შედეგი 1992-93 წლებში - რუბენ სოსას, 1997-98 წლებში - რონალდოს და 2009-10 წლებში დიეგო მილიტოს ჰქონდათ.
18 - Inter players able to score at least 18 goals in their first Serie A campaign played for the Nerazzurri: #Lukaku 2019/20
— OptaPaolo (@OptaPaolo) June 21, 2020
Milito 2009/10
Ronaldo 1997/98
Ruben Sosa 1992/93
Impact.#InterSampdoria
ასეთი შედეგიანობის მიუხედავად, ლუკაკუ ჩემპიონატის ბომბარდირთა დავის ლიდერ ჩირო იმობილეს 9 გოლით ჩამორჩება. მათ შორის კი, 21 გოლით, კრიშტიანუ რონალდუა.
„ნერაძურიმ“ 26 ტურში 57 ქულა მოაგროვა და ცხრილის მე-3 ადგილი გაიმყარა, „იუვესთან“ დაშორება 6 ქულაა, ხოლო „ლაციო“ მილანელებს 5 ქულით უსწრებს. კონტეს გუნდის შემდეგი მეტოქე „სასუოლო“ იქნება.