ქართველი ძალოსნის ბრწყინვალე გამოსვლა და სამი ოქროს მედალი ევროპის ჩემპიონატზე
გურამ ვეკუამ (96 კგ) ევროპის ჩემპიონობა 3 ოქროს მედლით იზეიმა და ევროპის რეკორდებიც დაამყარა!
ისრაელის ქალაქ ეილატში მიმდინარე ჭაბუკ (15 წლამდე) ძალოსანთა ევროპის ჩემპიონატზე გურამ ვეკუამ ატაცში 118/122/126 კილოგრამი დაძლია და გამარჯვება მოიპოვა. ძალოსანმა მეორე მისვლაზე საქართველოს რეკორდი 2, ხოლო ევროპის სარეკორდო ზღვარი 1 კილოგრამით გაზარდა, მესამე მისვლაზე კი ვეკუამ ევროპის რეკორდი მთელი 5 კილოგრამით გააუმჯობესა.
გურამ ვეკუა აკვრაშიც საუკეთესო იყო. ძალოსანმა 144/148/151 დაძლია და აქაც ოქროს მედალი დაისაკუთრა! ძალოსანმა ყველა მისვლაზე ევროპის რეკორდი დაამყარა და ორჭიდის ჯამში მოგროვებული 277 კილოგრამითაც ოქროსმედალოსანი გახდა, რაც ასევე ევროპის რეკორდს უდრიდა!
მომზადებულია საქართველოს ძალოსნობის ეროვნული ფედერაციის მიხედვით.
ფოტოები Georgian Weightlifting Federation საქართველოს ძალოსნობის ეროვნული ფედერაციის Facebook გვერდი.
