ჰარდენის 55 ქულა და ისტორიული შედეგი
ჯეიმს ჰარდენმა „კლივლენდ კავალიერსთან“ მატჩში კიდევ ერთხელ გაიბრწყინა და ელიტურ კომპანიას შეუერთდა.
„ჰიუსტონ როქეთსის“ მსროლელმა მცველმა „კავსის“ წინააღმდეგ 55 ქულა, 3 მოხსნა, 8 შედეგიანი გადაცემა, 2 ჩაჭრა და ამდენივე დაფარება მიითვალა. „წვერამ“ პერიმეტრიდან 10 სროლა გამოიყენა და NBA-ის ისტორიაში მეოთხე კალათბურთელი გახდა, რომელმაც მინიმუმ 10 სამქულიანი რამდენიმე შეხვედრაში ჩააგდო. აქამდე მსგავსი შედეგი მხოლოდ ჯეი არ სმიტს, სტეფ კარის და კლეი ტომპსონს ჰქონდათ დაფიქსირებული. სმიტმა 10 ან მეტი სამიანი 3 შეხვედრაში ჩააგდო, ტომპსონმა 5-ში, ხოლო კარიმ - 15-ში.
გარდა ამისა ჰარდენი მაიკლ ჯორდანსა და კობი ბრაიანტს ერთი ნაბიჯით მიუახლოვდა. ხსენებულ დუეტს 50 ქულა 17 ფრენჩაიზის წინააღმდეგ აქვს გაკეთებული. „წვერასთვის“ კი „კლივლენდი“ მე-15 აღმოჩნდა.
აქვე გეტყვით, რომ „ჰიუსტონის“ რიგებში ჰარდენთან ერთად რასელ უესტბრუკიც გამოირჩა, რომელმაც 23 ქულა, 7 მოხსნა და 6 შედეგიანი გადაცემა მიითვალა. კლინ კაპელამ კი აქტივში ორმაგი დუბლი ჩაიწერა - 10 ქულა, 13 მოხსნა.
„კავალიერსთან“ მოპოვებული გამარჯვება „როქეთსისთვის“ მიმდინარე სეზონში მე-16 გახლდათ. ტექსასელები დასავლეთ კონფერენციის მეოთხე პოზიციას იკავებენ და მომდევნო მატჩში „ორლანდო მეჯიქს“ შეერკინებიან.