NBA-ში "გრიკ ფრიკი" და "მელო" გამოარჩიეს
NBA-ის მიმდინარე სეზონის მეექვსე კვირის საუკეთესო მოთამაშეებად "მილუოკი ბაქსის" მსუბუქი ფორვარდი, იანის ანტეტოკოუნმპო და "პორტლენდ ტრეილ ბლეიზერსის" მსუბუქი ფორვარდი, კარმელო ენტონი დაასახელეს.
ანტეტოკოუნმპოს საოცარი თამაშის წყალობით "მილუოკიმ" 4-დან 4 შეხვედრაში იმარჯვა და "იუტა", "ატლანტა", "კლივლენდი" და "შარლოტი" დაამარცხა. ბერძენი ოთხივე მატჩში ბრწყინვალე იყო და საშუალოდ 34.8 ქულას, 11.3 მოხსნას და 4 შედეგიან გადაცემას აგროვებდა. "ჯაზმენების" წინააღმდეგ ანტეტოკოუნმპომ საერთოდ 50 ქულა, 14 მოხსნა და 6 ასისტი გაიფორმა.
ნაციონალურმა საკალათბურთო ასოციაციამ დასავლეთ კონფერენციაში კარმელო ენტონის გარჯა დააფასა. NBA-ში ახლად დაბრუნებულმა "მელომ" თავის გუნდს 3-დან 3 მატჩი მოაგებინა და საშუალოდ 22.3 ქულას, 7.7 მოხსნას და 2.7 შედეგიან გადაცემას აგროვებდა. გასულ კვირაში ენტონი პარკეტიდან 57.4 პროცენტით უტევდა, ხოლო პერიმეტრიდან ნასროლი ბურთების 45.5 პროცენტი ჩააგდო.