ხაბიბი: "რონალდუმ მითხრა, რომ ის ასეთი ძლიერი მესისთან კონკურენციამ გახადა"

UFC-ის მთავარმა ვარსკვლავმა და დღემდე დაუმარცხებელმა ხაბიბ ნურმაგომედოვმა ფეხბურთის შესახებ ისაუბრა.

როგორც ცნობილია, ხაბიბი „რეალისა“ და რონალდუს დიდი თაყვანისმცემელია.

წარმოშობით დაღესტნელმა მებრძოლმა კრიშტიანუსთან საინტერესო საუბარი გაიხსენა და განაცხადა:

„მე უკვე დიდი ხანია „რეალის“ გულშემატკივარი ვარ და რონალდუსთანაც ვმეგობრობ. ამიტომ მასსა და მესის შორის მე კრიშტიანუს ვირჩევ. თუმცა, ეს იმას სულაც არ ნიშნავს, რომ The Best-ის ჯილდოს არგენტინელი არ იმსახურებდა.

რონალდუმ მითხრა, რომ ის ასეთი ძლიერი მესისთან კონკურენციამ გახადა. როდესაც სერიოზული და კარგი მოწინააღმდეგე გამოგიჩნდება, ეს შენ ყოველდღიურად შრომას გაიძულებს. ისინი ერთმანეთს ავსებენ და აძლიერებენ“.