FIFA ბრალდებებს უარყოფს! ყველაფერი წესების დაცვით მოხდა
The Best-ის დაჯილდოების შემდეგ FIFA საფეხბურთო სამყაროს ყურადღების ცენტრში მოექცა. ყველაფერი ნიკარაგუის ეროვნული ნაკრების კაპიტნის, ხუან ბარერას სკანდალურ განცხადებას მოჰყვა.
30 წლის ფეხბურთელის თქმით, მას ფიფას The Best-ის გამოკითხვაში მონაწილეობა არ მიუღია, თუმცა მისი ხმა მაინც დაფიქსირდა და ის ლეო მესის მიაწერეს. ამის შემდეგ იტალიურმა გამოცემა Tuttosport-მა განაცხადა, რომ "იუვენტუსის" ფეხბურთელი, კრიშტიანუ რონალდუ "გაძარცვეს".
ESPN-თან საუბრისას FIFA-ს წარმომადგენლებმა ყველაფერი უარყვეს და აღნიშნეს, რომ მსგავსი არაფერი მომხდარა: "ნიკარაგუის ფედერაციის მიერ მოწოდებული დოკუმენტები გადავამოწმეთ. ყველა მათგანი ხელმოწერილია და ნიკარაგუის ფედერაციის ბეჭდითაა დამოწმებული".
"ნიკარაგუის ფედერაციისგან მიღებული დოკუმენტები Fifa.com-ზე გამოქვეყნებულ გამოკითხვას შევადარეთ და ვადასტურებთ, რომ ყველაფერი წესრიგშია".
FIFA-ს წარმომადგენლებმა დასძინეს, რომ ეგვიპტის ფეხბურთის ასოციაციის ხმები იმიტომ არ დააფიქსირეს, რომ დოკუმენტზე ხელმოწერა დიდი ასოებით იყო შესრულებული და პლუს ამას ხმის მიცემის ბლანკს ფედერაციის გენერალური მდივნის ხელმოწერა აკლდა.