ცუკიოტოში - მე-3 გამარჯვება! ტოჩინოშინმა უხერხული მეტოქე დაამარცხა!

ტოკიოში მიმდინარე „აკი ბაშოს“ მე-8 სატურნირო დღეს ტოჩინოშინი მისთვის ერთ-ერთ მთავარ უხერხულ მეტოქეს მე-4 მაეგაშირა შოდაის დაუპირისპირდა და ცუკიოტოშის ილეთით დაამარცხა.

„ტოჩი“ დოჰიოზე კარგად მოძრაობდა და უპირატესობას პირველივე კონტაქტის შემდეგ დაეუფლა, რის შემდეგაც მეტოქის დაქნევა აღარ გასჭირვებია. ამრიგად, გორგაძეს ბალანსი 3-5-ზე აქვს.

 

დღევანდელ დაპირისპირებამდე ლევანი შოდაის 14-ჯერ შეხვდა და 8 მარცხი იწვნია. იაპონელმა ბოლო 7 ორთაბრძოლებიდან 6-ის მოგება შეძლო.

ბაშოს მე-9 დღეს ლევან გორგაძე კომოსუბი შოტა ენდოს შეერკინება, რომელთანაც ურთიერთშეხვედრებში 4-6 მარცხდება.

ენდო „აკი ბაშოზე“ დამაჯერებლად ასპარეზობს და მოგება-წაგებათა ბალანსი 6-2-ზე აქვს.

თუ, მიმდინარე ტურნირზე ტოჩინოშინი 8 ბრძოლას ვერ მოიგებს, ის დროებით ოძეკის წოდებას დაკარგავს და მომდევნო ბაშოზე მის დასაბრუნებლად 10 ბრძოლის მოგება მოუწევს, წინააღმდეგ შემთხვევაში ოძეკობას დაემშვიდობება.

P.S. დღეს ტრავმის გამო ტურნირს მეორე იოკოძუნაც, კაკურიუც ჩაეხსნა.