გოგონათა საფეხბურთო ნაკრები იტალიას დაუპირისპრიდება
საქართველოს ქალთა ეროვნული ნაკრები ევრო 2021-ის საკვალიფიკაციო ეტაპის მატჩისთვის მზადებას განაგრძობს.
ქართველი გოგონები მეორე შეხვედრას 3 სექტემბერს, თბილისში მიხეილ მესხის სახელობის სტადიონზე გამართავენ.
ლევან ბაჯელიძის გუნდის მეტოქე იტალიის ეროვნული ნაკრები იქნება.
მატჩი 16:15 საათზე დაიწყება, დასწრება თავისუფალია.
საქართველოს ქალთა ეროვნულმა ნაკრებმა ევრო 2021-ის საკვალიფიკაციო ეტაპის პირველი შეხვედრა სტუმრად ბოსნია-ჰერცეგოვინას ნაკრების წინააღმდეგ გამართა.
მატჩი მასპინძელთა უპირატესობით წარიმართა და მათი გამარჯვებით 7:1 დასრულდა.
საქართველოს ნაკრების შემადგენლობიდან ერთადერთი გოლის ავტორი შეცვლაზე შემოსული ანა ჩემინავა გახდა.
