გუარინი ისევ "ნერაძურიში"? - ოღონდ, ამჯერად - ბერგამოულში...

ბერგამოს „ატალანტა“ ჩემპიონთა ლიგისთვის ემზადება და შემადგენლობის გაძლიერებას ცდილობს. გამოცემა Tuttomercatoweb-მა „ნერაძურის“ კოლუმბიელი ნახევარმცველი, ფრედი გუარინი, დაუკავშირა.

ფეხბურთელი ამჟამად ჩინურ „შანხაი შენხუაში“ თამაშობს, თუმცა, როგორც ჩანს, აზიის დატოვებას გეგმავს და იტალიის სერია A-ში დაბრუნებას განიხილავს. იგი 2012-2016 წლებში „ინტერის“ მაისურით ასპარეზობდა.

Gazzetta dello Sport-ის თქმით, გუარინს „ატალანტაში“ გადასვლის იდეა მოსწონს, თუმცა პრობლემა, შესაძლოა, მისი ხელფასი გახდეს. იგი ჩინეთში წლიურად 10 მილიონ ევროს გამოიმუშავებს, „შავ-ლურჯები“ კი მხოლოდ 1 მილიონ ევროს სთავაზობენ.

საგულისხმოა ისიც, რომ 33 წლის კოლუმბიელ შუახაზელს „შანხაი შენხუასთან“ კონტრაქტი 5 თვეში ეწურება.

სატრანსფერო ექსპერტი, ჯანლუკა დი მარციო, ასევე გვამცნობს, რომ „ატალანტა“ როდრიგო პალასიოს დამატებაზეც ფიქრობს. არგენტინელს სეზონის ბოლოს „ბოლონიასთან“ კონტრაქტი დაუსრულდა და ამჟამად თავისუფალი აგენტის სტატუსით სარგებლობს.