სერენა უილიამსი უიმბლდონის ფინალში მე-11-ედ გავიდა
უიმბლდონის ქალთა თანრიგის ნახევარფინალური ეტაპის მეორე შეხვედრაში ერთმანეთის წინააღმდეგ სერენა უილიამსმა და დიდი სლემის ტურნირების ნახევარფინალის ყველაზე ასაკოვანმა დებიუტანტმა, ბარბორა სტრიცოვამ, ითამაშეს.
ამერიკელმა ვარსკვლავმა მატჩი ერთი ამოსუნთქვით ჩაატარა და ჩეხი მეტოქის დასამარცხებლად სულ რაღაც 59 წუთი დასჭირდა - 6:1; 6:2.
One step away from an eighth #Wimbledon singles title...@serenawilliams defeats Barbora Strycova 6-1, 6-2 in 59 minutes on Centre Court pic.twitter.com/PzZzr8qi9M
— Wimbledon (@Wimbledon) July 11, 2019
სერენა უიმბლდონის ფინალში მე-11-ედ გავიდა და ტიტულის მერვედ მოგებას შეეცდება. თუკი ამას შეძლებს, კარიერაში 24-ე დიდი სლემის ტურნირს მოიგებს, რითაც მარგარეტ კორტის მაჩვენებელს გაუთანაბრდება.
მისი მოწინააღმდეგე სიმონა ჰალეპი იქნება, რომელმაც ელინა სვიტოლინა ასევე მარტივად დაამარცხა. როლან გაროსის გასული წლის ჩემპიონობის შემდეგ რუმინელი დიდი სლემის მეორე ტიტულს დაუმიზნებს. უილიამსისა და ჰალეპის ფინალური შეხვედრა შაბათს გაიმართება.
