ენდი და სერენა უიმბლდონის შერეულ წყვილებს 1/8 ფინალიდან გამოეთიშნენ

ენდი მარეი და სერენა უილიამსი უიმბლდონის შერეულ წყვილთა გათამაშებას მერვედფინალური ეტაპიდან გამოეთიშნენ.

ვარსკვლავურმა დუეტმა ბრუნო სოარეშისა და ნიკოლ მელიჩარის წყვილთა 3 სეტში - 3:6; 6:4; 2:6 წააგო. პირველი და მეორე სეტის ბედი ერთადერთმა ბრეიკმა გადაწყვიტა, მესამე პარტია კი ენდიმ და სერენამ საშინლად დაიწყეს, თავიანთი 2 გეიმი ზედიზედ დათმეს, რის შემდეგაც სიტუაციის გამოსწორება ვეღარ შეძლეს.

სოარეში/მელიჩარის დუეტი ტურნირზე პირველ ნომრადაა განთესილი და ტიტულის მოგების მთავარ პრეტენდენტად ითვლება. ჩოგბურთელებმა წელს ერთობლივად ავსტრალიის ღია პირველობასა და როლან გაროსზე 1/2 ფინალურ ეტაპზე ითამაშეს.

ასე რომ, ენდი მარეისთვის წლევანდელი უიმბლდონი დასრულდა, მან, პიერ-უგო ერბერთან ერთად, მამაკაცთა წყვილთა შორის კიდევ უფრო ადრეულ სტადიაზე წააგო. ბრიტანელი ვარსკვლავი მხრის ტრავმის შემდეგ კორტს სწორედ უიმბლდონზე დაუბრუნდა. მისი სამომავლო გეგმებისა თუ ტურნირების შესახებ ჯერჯერობით არაფერი ვიცით.