ფედერერი და ნადალი 2008 წლის ლეგენდარული ფინალის შემდეგ უიმბლდონზე პირველად შეხვდებიან
უიმბლდონის მამაკაცთა თანრიგში მეოთხედფინალურ ეტაპზე ყველა მატჩი ლოგიკური შედეგით დასრულდა და ნახევარფინალში მოსალოდნელი ოთხეული გავიდა.
დღის პირველი მატჩი მას შემდეგ დასრულდა, რაც ნოვაკ ჯოკოვიჩმა დავიდ გოფენს საჩოგბურთო გაკვეთილი ჩაუტარა და ჯამში მხოლოდ 6 გეიმი დაუთმო.
„ნოლემ“ ბელგიელ მეტოქეს პირველი სეტის 3:4-დან ზედიზედ 10 გეიმი (!!!) მოუგო, რამაც შეხვედრის ბედიც გადაწყვიტა - 6:4; 6:0; 6:2. სერბი ვარსკვლავი შესანიშნავ სვლას აგრძელებს და დიდი სლემის ტურნირებზე ჩატარებული ბოლო 32 მატჩიდან 31 თავის სასარგებლოდ დაასრულა.
Will anyone be able to stop the defending champion?
— Wimbledon (@Wimbledon) July 10, 2019
@DjokerNole’s 70th win at #Wimbledon sees the Serbian reach his ninth semi-final at The Championships after beating David Goffin pic.twitter.com/qSIPNWUz6z
ნახევარფინალურ სტადიაზე ითამაშებს ესპანელი რობერტო ბაუტისტა-აგუტიც, რომელმაც მილოშ რაონიჩის დამმარცხებელ გუიდო პელას 4 სეტში აჯობა. ბაუტისტა-აგუტი მთელი მატჩის განმავლობაში დომინირებდა, მეტოქეს დამაჯერებლად - 7:5; 6:4; 3:6; 6:3 მოუგო და დიდი სლემის ტურნირის 1/2 ფინალში პირველად გავიდა. აგუტი მე-6 ესპანელია, რომელიც აღნიშნულ ეტაპზე ითამაშებს.
Welcome to the last four...@BautistaAgut reaches the semi-finals of a Grand Slam for the first time with a 7-5, 6-4, 3-6, 6-3 victory against Guido Pella#Wimbledon pic.twitter.com/aNP9oPOL57
— Wimbledon (@Wimbledon) July 10, 2019
ჩვეულად დამაჯერებელი და მრისხანე იყო რაფაელ ნადალი. „მატადორმა“ ამერიკელ სემ ქუერის შანსი არ დაუტოვა. რაფა პირველ სეტშიც საგრძნობ უპირატესობას ფლობდა, თუმცა მის მოსაგებად მაინც 12 გეიმი დასჭირდა, შემდეგ კი საქმე გაცილებით მარტივი გახდა და ესპანელს პრობლემა აღარ ჰქონია - 7:5; 6:2; 6:2.
ნადალი, რომელმაც წლის შემაჯამებელ ტურნირზე თამაში გაინაღდა, დიდი სლემის ტურნირების 1/2 ფინალში 32-ედ მოხვდა, რაც ღია ერაში მხოლოდ ნოვაკ ჯოკოვიჩისა (36) და როჯერ ფედერერის შედეგს (45) ჩამორჩება.
"He's been in phenomenal form"
— Wimbledon (@Wimbledon) July 10, 2019
For the first time since 2008, @RafaelNadal and @rogerfederer will face each other at #Wimbledon pic.twitter.com/wvJvAlLweH
დღის ცენტრალური შეხვედრა სწორედ ფედერერსა და კეი ნიშიკორის შორის ჩატარდა. იაპონელმა თამაში კარგად დაიწყო და პირველი სეტის მოგებაც შეძლო.
ამის შემდეგ „მხიარული როჯერი“ დიდ უპირატესობას დაეუფლა და საკუთარი გამარჯვება ეჭვის ქვეშ წამითაც აღარ დაუყენებია - 4:6; 6:1; 6:4; 6:4. შედეგად, შვეიცარიელმა ლეგენდამ უიმბლდონზე საიუბილეო - მე-100 მატჩი მოიგო, ტურნირის 1/2 ფინალში კი მე-13-ედ ითამაშებს, რაც სარეკორდო მაჩვენებელია. ფედერერი ისტორიაში პირველი ჩოგბურთელია, რომელმაც დიდი სლემის ერთ-ერთ ტურნირზე 100 ან მეტი გამარჯვება იზეიმა.
100 #Wimbledon wins.
— Wimbledon (@Wimbledon) July 10, 2019
The moment @rogerfederer became a centurion at The Championships… pic.twitter.com/RFszCCbMnl
უიმბლდონის მამაკაცთა თანრიგის ნახევარფინალური მატჩები პარასკევს გაიმართება. ნოვაკ ჯოკოვიჩი რობერტო ბაუტისტა-აგუტს დაუპირისპირდება, ნადალი და ფედერერი კი უიმბლდონზე ერთმანეთს 2008 წლის ლეგენდარული ფინალის შემდეგ პირველად შეხვდებიან.
