ორი დებიუტანტი და ორი ძველი კადრი - უიმბლდონზე ქალთა ნახევარფინალისტები გამოვლინდა
უიმბლდონის ქალთა თანრიგში ნახევარფინალური წყვილები გაირკვა. ტურნირის მე-8 დღეს სიმონა ჰალეპმა ჩინელ შუაი ჟანს 2 სეტში მოუგო და უიმბლდონის საუკეთესო ოთხ ჩოგბურთელში მეორედ გავიდა.
რუმინელმა თამაში ცუდად დაიწყო და 1:4 ჩამორჩა, თუმცა პირველი პარტია ტაიბრეიკზე აიღო, რასაც იოლი მეორე სეტი მოჰყვა, საბოლოოდ - 7:6; 6:1.
A semi-finalist once again…@Simona_Halep defeats a spirited Shuai Zhang 7-6(4), 6-1 to make the #Wimbledon final four for the first time since 2014 pic.twitter.com/IVGkZ9Njxl
— Wimbledon (@Wimbledon) July 9, 2019
საკმაოდ რთული ორსეტიანი მატჩი ჩაატარა ელინა სვიტოლინამ, რომელსაც ოდნავ გადაღლილი კაროლინა მუჩოვა ხვდებოდა. მუჩოვამ თამაშამდე 1 დღით ადრე, კაროლინა პლიშკოვას წინააღმდეგ თითქმის 4-საათიანი მატჩი გამართა.
22 წლის ჩეხს გადამწყვეტ მომენტებში სწორედ ენერგია დააკლდა, რითაც სვიტოლინამ კარგად ისარგებლა და თამაში 7:5; 6:4 მოიგო. იგი პირველი უკრაინელი ქალია, რომელიც დიდი სლემის ტურნირის ნახევარფინალში ითამაშებს.
Through to her first Grand Slam semi-final ????@ElinaSvitolina beats Karolina Muchova 7-5, 6-4 on No.1 Court to set up last four clash with Simona Halep#Wimbledon pic.twitter.com/eONIrcWaE6
— Wimbledon (@Wimbledon) July 9, 2019
რთული ბრძოლის გადატანა მოუწია სერენა უილიამსსაც. 37 წლის ამერიკელს თანამემამულე ალისონ რისკეს წინააღმდეგობის დასაძლევად 2 საათი და 3 წუთი დასჭირდა.
სერენამ პირველი სეტი მოიგო, თუმცა მეორე პარტია უკეთესად რისკემ ჩაატარა და ანგარიში გაათანაბრა, რასაც გადამწყვეტი სეტის ბრეიკით დაწყებაც მიაყოლა. უმცროსი უილიამსი დროულად გამოფხიზლდა, მატჩი თავის სასარგებლოდ - 6:4; 4:6; 6:3 დაასრულა და უიმბლდონის ნახევარფინალში მე-12-ედ გავიდა.
Serena comes through an almighty test…
— Wimbledon (@Wimbledon) July 9, 2019
Winning a hard-fought quarter-final against compatriot Alison Riske, @serenawilliams reaches her 12th #Wimbledon singles semi-final pic.twitter.com/UYHmxO0nuP
წარმომადგენლის გარეშე დარჩა მასპინძელი დიდი ბრიტანეთი, რომლის ბოლო იმედმა, იოჰანა კონტამ, ჩეხ ბარბორა სტრიცოვას ვერაფერი მოუხერხა.
კონტამ თამაში ბრეიკით დაიწყო და კომფორტულ უპირატესობასაც ფლობდა, თუმცა სტრიცოვამ საქმე ტაიბრეიკამდე მიიყვანა, რომელზეც მეტოქეზე უკეთესად ითამაშა და სეტებში დაწინაურდა.
როგორც აღმოჩნდა, კონტასთვის ეს დიდი დარტყმა იყო და ბრიტანელი მეორე სეტში საკუთარ თავს აღარ ჰგავდა. სტრიცოვამ იგი ყველა საჩოგბურთო ასპექტში დაჩაგრა, 7:6; 6:1 იმარჯვა და 33 წლის ასაკში დიდი სლემის ტურნირის ნახევარფინალში პირველად ითამაშებს.
Serena Williams awaits for a place in the #Wimbledon final…@BaraStrycova is into her first ever Grand Slam semi-final after beating Johanna Konta pic.twitter.com/vHPxMvFwV7
— Wimbledon (@Wimbledon) July 9, 2019
ქალთა ნახევარფინალური მატჩები ხუთშაბათს გაიმართება. ელინა სვიტოლინა სიმონა ჰალეპს შეხვდება, სერენა უილიამსის მეტოქე კი სწორედ ბარბორა სტრიცოვა იქნება.