Aa Aa
25 აპრილი 2019  |  13:05

ნადალმა ბარსელონაში მძიმე გამარჯვებით დაიწყო

ბარსელონას ტურნირი საკმაოდ რთული გამარჯვებით დაიწყო რაფაელ ნადალმა, რომელმაც ლეონარდო მაიერის წინააღმდეგობა 3-სეტიან ბრძოლაში დასძლია. მატჩის პირველი პარტია არგენტინელმა ტაიბრეიკზე მოიგო, რის შემდეგაც რაფამ უპირატესობა ხელთ იგდო და იგი აღარ გაუშვია, საბოლოოდ კი შეხვედრა - 6:7; 6:4; 6:2-ით დახურა.

ნადალი მომდევნო რაუნდში ვეტერან თანამემამულეს, დავიდ ფერერს დაუპირისპირდება, რომელმაც ჯერ მიშა ზვერევს მოუგო, წინა წრეში კი ლუკა პუიე გაანადგურა. ფერერმა, რომელიც რამდენიმე კვირაში კარიერას ასრულებს, ახალგაზრდა ფრანგს შანსი არ დაუტოვა და მხოლოდ 4 გეიმი დაუთმო - 6:3; 6:1.

დღის ერთ-ერთი გამორჩეული შეხვედრა გრიგორ დიმიტროვსა და ფერნანდო ვერდასკოს შორის შედგა. ბულგარელმა პირველი სეტი იოლად მოიგო, რასაც მეორე პარტიის ტაიბრეიკზე წაგება მოჰყვა, მესამე სეტში კი დიმიტროვის უპირატესობა აშკარა იყო - 6:2; 6:7; 6:3. დიმიტროვი შემდეგ წრეში ალექსანდრ ზვერევის დამმარცხებელ ნიკოლას ჯარის შეხვდება.

თავისი მატჩი წააგო დენის შაპოვალოვმა, რომელსაც დაუძლეველ ბარიერად კრისტიან გარინი ექცა. ჩილელმა ჩოგბურთელმა თამაში დამაჯერებლად ჩაატარა და 7:5; 6:2 იმარჯვა.

დღევანდელი სათამაშო დღის მთავარი მატჩი უდავოდ ნადალი-ფერერია, დანარჩენი შეხვედრებიდან კი ნიშიკორი-ოჟე ალიასიმის, ტიმი-მუნარისა და შტრუფი-ციციპასის თამაში უნდა გამოვარჩიოთ.

გაზიარება:

მსგავსი სიახლეები