ქართველების აღიარება ყაზახეთში - კანკავა და კვეკვესკირი სიმბოლურ გუნდში
უზბეკეთის პრემიერლიგის გასული ტურის სიმბოლურ გუნდში ''ტობოლის'' ქართველი ლიდერები, ნიკა კვეკვესკირი და ჯაბა კანკავა მოხვდნენ. სიმბოლური გუნდი ყაზახურმა kazfootball-მა შეადგინა.
''ჟეტისუსთან'' შეხვედრაში კვეკვესკირმა გოლი გაიტანა, კანკავამ კი საგოლე გადაცემა შეასრულა, რაც გამარჯვებისთვის საკმარისი არ აღმოჩნდა, შეხვედრა ფრედ 2:2 დასრულდა.
აღნიშნულ შეხვედრაში კვეკვესკირის წინააღმდეგ მეტოქის ფეხბურთელმა უხეშად ითამაშა, რის გამოც ქართველმა კოჭი იღრძო და 56-ე წუთზე შეცვალეს. კვეკვესკირი ორ კვირაში სავარჯიშო პროცესს განაახლებს.
kazfootball-ი კვეკვესკირის შესახებ
''კვეკვესკირმა ''ჟეტისუს'' წინააღმდეგ ძალიან კარგი მატჩი ჩაატარა. მან გატანილი გოლის გარდა ორთაბრძოლების 65 პროცენტი მოიგო, მის ანგარიშზეა 4 წარმატებული დრიბლინგი. გარდა ამისა მისი გადაცემების 87 პროცენტი ზუსტი აღმოჩნდა.
ქართველი ნახევარმცველი შესანიშნავად თამაშობდა. რომ არა ტრავმა, მისი პროდუქტიულობა გაცილებით მაღალი იქნებოდა. მისი მარგი ქმედების კოეფიციენტი 283-ს შეადგენს.''
საქართელოს ეროვნული ნაკრების 26 წლის ნახევარმცველი კოჭის ტრავმის გამო ორი კვირა დაისვენებს. Crystalsport-ის ცნობით კვეკვესკირი სანაკრებო შეკრებისთვის მზად იქნება. ვლადიმირ ვაისის გუნდი ერთა ლიგის მესამე ტურში, 13 ოქტომბერს ''დინამო არენაზე'' ანდორას უმასპინძლებს, 16 ოქტომბერს კი რიგაში ლატვიას ესტუმრება.
შეგახსენებთ, 21-ე წუთზე ''ჟეტისუ'' დაწინაურდა. 32-ე წუთზე ''ტობოლმა'' ანგარიში გაათანაბრა, ნიკა კვეკვესკირმა ზუსტი დარტყმით მიმდინარე სეზონში პირველი გოლი შეაგდო.
35-ე წუთზე ჯაბა კანკავამ ბურთი სტუმართა საჯარიმოში ჩააწოდა, რასაც ნურგალიევის თავური დარტყმა მოჰყვა და ''ტობოლი'' წინ გავიდა - 2:1.
kazfootball-ი კანკავას შესახებ
''ტრადიციულად კანკავა მოედნის ცენტრში შესანიშნავად მოქმედებდა. ის შლიდა მეტოქის შეტევებს და მისი ორგანიზებით ''ტობოლი'' შეტევებს იწყებდა. კანკავამ ორთაბრძოლების 61 პროცენტი მოიგო. გაიმარჯვა 4 საჰაერო ორთაბრძოლაში. ოთხი ართმევიდან ოთხივე მცდელობა წარმატებით დაასრულა. კანკავას გადაცემების 92 პროცენტი ზუსტი გამოვიდა. მისი მარგი ქმედების კოეფიციენტი 294-ს შეადგენს.''