წლის "ქამბექი"?! - გორგოძის ხმაურიანი დასაწყისი US Open-ზე!

ეკატერინე გორგოძემ დიდი სლემის ტურნირებზე კარიერაში პირველად ითამაშა და გასაოცარი, დასამახსოვრებელი სადებიუტო მატჩი გამოუვიდა.

ქართველის მოწინააღმდეგე ადგილობრივი თინეიჯერი, კეტი მაკნელი გახლდათ, რომელთანაც ეკომ პირველი სეტი 0:6 წააგო, მეორეში კი 1:5 მარცხდებოდა. შეხვედრის ბედი გადაწყვეტილი ჩანდა, თანაც პროცესში ამერიკელს 3 მატჩ-პოინტიც ჰქონდა, თუმცა გორგოძე დანებებას არ აპირებდა და პუბლიკა ბრწყინვალე "ქამბექით" გააოცა.

1:5-დან, ჩვენმა თანამემამულემ უმძიმესი გეიმები მოიგო, თითქმის ყველა მათგანში თამაშის წაგების ზღვარზე იყო, საბოლოოდ კი სეტი 7:5-ით დახურა და საქმე გადამწყვეტ პარტიამდე მივიდა.

ასეთი სვლის შემდეგ გორგოძეს უპირატესობა მიეცა და მე-3 სეტში მეტოქეს დამაჯერებლად აჯობა - 0:6; 7:5; 6:2.

ეკომ 2 ეისი მოაწოდა და ორმაგი შეცდომა არ დაუშვია. ტრადიციულად, კარგად იყენებდა პირველ მოწოდებას - 88-დან 74, რამაც ქულების 55%-ის მოგების საშუალება მისცა (74-დან 41), მეორე მოწოდებაზე კი 14-დან 4 ქულა მოიგო. მან 6 ბრეიკი შეასრულა და თავისი ჩაწოდებაც ამდენჯერვე დაკარგა.

ეკატერინე გორგოძე საკვალიფიკაციო ეტაპის მე-2 რაუნდში ყველასათვის კარგად ნაცნობ ჩოგბურთელს, ეჟენი ბუშარს შეხვდება, რომელმაც ჟაოს წინააღმდეგობა ძალიან მარტივად დასძლია - 6:0; 6:1. ბუშარი 2014 წლის უიმბლდონის ფინალისტია და უნიჭიერეს მოთამაშედ ითვლებოდა, თუმცა ბოლო წლებში თამაშს უკლო და კარიერაში WTA-ს ერთადერთი ტიტული აქვს მოგებული - 2014 წელს, ნიურნბერგის საშუალო დონის გათამაშება.