კრიშტიანუმ სამედიცინო შემოწმება გაიარა! - ფანების ოვაციები და დახვედრა ტურინში
იტალიური საკლუბო ფეხბურთის ისტორიაში ყველაზე ძვირადღირებული შენაძენი, კრიშტიანუ რონალდუ ტურინში დედა - მარია დოლორესთან, უფროს შვილთან და მეგობარ გოგონა - ჯორჯინა როდრიგესთან ერთად ჩავიდა.
პორტუგალიელი სუპერვარსკვლავის თვითმფრინავი, ტურინის Caselle Airport-ში გუშინ საღამოს დაეშვა.
დღეს დილით, რონალდუმ სამედიცინო შემოწმება J-Medical-ში გაიარა, რომლის სიახლოვესაც მას ფანები დახვდნენ და ოვაციები მოუწყვეს. 33 წლის ფეხბურთელმა ავტოგრაფები დაარიგა და "ვეკია სინიორას" ტიფოზებს მიესალმა.
Sono iniziate le visite mediche di @Cristiano = ????????????#CR7DAY #CR7JUVE pic.twitter.com/D6N2t6hyum
— JuventusFC (@juventusfc) July 16, 2018
როგორც დაგეგმილია, სამედიცინო შემოწმების გავლის შემდეგ, კრიშტიანუ ახალ თანაგუნდელებსა და მასიმილიანო ალეგრის უნდა შეხვდეს. ადგილობრივი დროით 18:30 საათზე (თბილისის დროით - 20:30) კი სპეციალური პრესკონფერენცია გაიმართება.
„იუვენტუსს“ რონალდუს ტრანსფერი 105 მილიონი ევრო დაუდჯა. სამაგიეროდ, კლუბის აქციების ფასმა ბოლო დღეებში 30%-ით მოიმატა. Instagram-ზე კი ტურინელებს მიმდევართა 11%-ანი ზრდა აქვთ. უკანასკნელ კვირაში „ბებერ ქალბატონს“ 1,1 მილიონი მიმდევარი შეემატა, რაც რა თქმა უნდა რონალდუს დამსახურებაა.
ფეხბურთის ისტორიაში პირველად მოხდა, რომ 33 წლის ფეხბურთელმა ახალ კლუბთან 4 წლიან კონტრაქტს მოაწერა ხელი, რომლის მიხედვითაც, მის ანგარიშზე ყოველწლიურად 30 მილიონი ევრო ჩაირიცხება.
რონალდუ ტურინულ გუნდში 7 ნომრით ითამაშებს. საინტერესოა, რომ 14 ივლისის მონაცემებით, ''იუვეს'' ქომაგებმა სუპერვარსკვლავის 520 ათასი მაისური შეიძინეს. რაც შეეხება კრიშტიანუს მაისურების შესაძენ ფასს, ბავშვების ფორმა 84,95 ევრო ღირს, ოფიციალური საშინაო ფორმა კი - 144,95 ევრო.
შესაბამისად, თუკი საშუალოდ დავიანგარიშებთ, მხოლოდ გაყიდული მაისურებით, "იუვენტუსის" ხაზინას სულ მცირე 60 მილიონი ევრო შეემატა.