ფედერერმა ჩორიჩთან წააგო და რეიტინგის პირველი პოზიცია დაკარგა
გერმანიის ქალაქ ჰალეში გამართული ტურნირი ბორნა ჩორიჩის გაამრჯვებით დასრულდა. ახალგაზრდა ხორვატმა ლეგენდარული როჯერ ფედერერი დაამარცხა და ATP-ს მე-2 ტიტული დაისაკუთრა.
თამაში 2 საათსა და 7 წუთს გაგრძელდა და მისი პირველი პარტია ტაიბრეიკამდე მივიდა, სადაც ჩორიჩმა 8:6 იმარჯვა და სეტებში დაწინაურდა.
ფედერერმა მე-2 სეტი 1 ბრეიკით, 6:3 მოიგო, თუმცა გადამწყვეტი პარტიისთვის კარგად ვერ მოემზადა და 2:6-ზე დამარცხდა, რაც მსოფლიო რეიტინგის ლიდერობის დაკარგვად დაუჯდა.
What an upset!@borna_coric defeats nine-time Halle champion Roger Federer 7-6(6), 3-6, 6-2 in the @GERRYWEBERWORLD final to lift his second #ATP ????.
— ATP World Tour (@ATPWorldTour) June 24, 2018
Read More ➡️ https://t.co/hLy9VHr3k9 pic.twitter.com/7HPSWZo9ga
ბორნა ჩორიჩმა კარიერაში მე-2 ტურნირი მოიგო, 500-იანი გათამაშების გამარჯვებული კი პირველად გახდა. მას აქამდე, მაროკოს 250-იანი ტურნირი ჰქონდა მოგებული.
ბორნა ჩორიჩმა ამ წარმატებისთვის 500 სარეიტინგო ქულა და 427 590 ევრო მიიღო, ფედერერს კი 300 ქულა და 209 630 ევრო ერგო.
ჩორიჩმა ფედერერის შესანიშნავი სვლა შეწყვიტა - "მაესტრო" ბალახის საფარზე ზედიზედ 20 მატჩი არ მარცხდებოდა. ამასთანავე, როჯერს ჰქონდა შანსი, რომ ჰალეს ტურნირი მეათედ მოეგო.
36 წლის შვეიცარიელი ხვალიდან მსოფლიოს მე-2 ჩოგანი იქნება და პირველ პოზიციას ისევ რაფაელ ნადალი დაიკავებს. თანაც, ფედერერს კარსმომდგარ "უიმბლდონზე" საჩემპიონო ქულები აქვს დასაცავი.
