Sports Illustrated: კვერკველია ''ლესტერში'' გადასვლასთან ახლოსაა
საქართველოს ეროვნული ნაკრების ფეხბურთელი სოლომონ კვერკველია ''ლესტერში'' გადასვლასთან ახლოსაა. გავლენიანი ამერიკული გამოცემის, Sports Illustrated-ის ცნობით მოსკოვის ''ლოკომოტივის'' 26 წლის ცენტრალური მცველი კარიერას ინგლისის პრემიერლიგის გუნდში გააგრძელებს.
ქართველმა ფეხბურთელმა 1TV-სთან საუბარში განაცხადა, რომ მოლაპარაკება მიმდინარეობდა, თუმცა leicestermercury იუწყებოდა, რომ ტრანსფერი ჩაიშალა. leicestermercury-ს მიერ გავრცელებული ინფორმაციის შემდეგ Sports Illustrated-ის ცნობით მოლაპარაკება დასასრულს უახლოვდება და მხარეები შეთანხმებასთან ახლოს არიან.
ახლახანს ინგლისის პრემიერლიგის 2016 წლის ჩემპიონმა 22 მილიონი ფუნტი სტერლინგის სანაცვლოდ ''ნორვიჩიდან'' ჯეიმს მედისონი გადაიბირა. კლოდ პიუელის გუნდმა მიმდინარე სატრანსფერო ფანჯრისას მესამე ტრანსფერი განახორციელა. ახალი სეზონიდან ინგლისური კლუბისთვის ჯონი ევანსი და რიკარდო პერეირა ითამაშებენ.
Summer signing no.3! ???? #lcfc have agreed terms with Norwich City for the transfer of midfielder James Maddison: https://t.co/syPUX6wRsu#WelcomeMaddison pic.twitter.com/2WUoqG8JEA
— Leicester City (@LCFC) June 20, 2018
Mirror-ის ცნობით მიუხედავად იმისა რომ ''მელიებმა'' ჯონი ევანსი გაიფორმეს, კლუბის მთავარ მწვრთნელ კლოდ პიუელს კვლავ სურს ქართველის შეძენა. ფრანგი სპეციალისტი დაცვის ცენტრში ჯონი ევანსისა და კვერკველიას შეწყვილებას გეგმავს.
"It’s the type of challenge that this team has risen to on many occasions before." ????
— Leicester City (@LCFC) June 15, 2018
Jonny Evans talks #PLfixtures ????https://t.co/1hdD26lIBn
მიმდინარე თვეში რუსული “იზვესტია'' იუწყებოდა, რომ ''ლესტერი'' მზად იყო 17 მილიონი ევროს სანაცვლოდ მოსკოვის ''ლოკომოტივის'' ცენტრალური მცველი სოლომონ კვერკველია შეეძინა, რომელიც 2017 წლის საქართველოს საუკეთესო ფეხბურთელად დასახელდა. ინგლისურმა კლუბმა ტრანსფერის თაობაზე ოფიციალურად მიმართა რუსეთის ჩემპიონს.
''რუბინში'' გატარებული წარუმატებელი პერიოდის შემდეგ 2017 წელს იური სიომინმა ქართველი ფეხბურთელი მოსკოვურ გუნდში მიიწვია და საქართველოს ეროვნული ნაკრების წევრმა თავი ბრწყინვალედ წარმოაჩინა. სწორედ მისმა კარგმა თამაშმა განაპირობა ინტერესი ინგლისური კლუბის მხრიდან.
''პორტსმუთის'' ყოფილი თანამფლობელი რომან დუბოვი ფიქრობდა, რომ ქართველის ტრანსფერი არარეალური იყო. მისი თქმით მას შემდეგ რაც ''ლესტერმა'' მოსკოვის ცსკა-დან აჰმედ მუსა გადაიბირა და ნიგერიელმა პრემიერლიგაში სუსტად ითამაშა, ინგლისური კლუბი რუსეთის ჩემპიონატიდან ფეხბურთელს არ შეიძენდა.