Adidas: "კეთილი იყოს შენი მობრძანება ოცნებათა თეატრში" - დიბალა "მანჩესტერში" ითამაშებს?!
პაულო დიბალას ტურინის "იუვენტუსიდან" შესაძლო წასვლის შესახებ უკვე დიდი ხანია იწერება.
ცნობილია, რომ არგენტინელი ფორვარდით მადრიდის "რეალი" და "მანჩესტერ იუნაიტედი" ინტერესდებიან.
დღეს, სპორტულმა ბრენდმა adidas-მა სენსაციური ინფორმაცია გაავრცელა. მათ, twitter-ის ოფიციალურ გვერდზე დაწერეს, რომ დიბალა მალე "მანჩესტერ იუნაიტედის" წევრი გახდება.
"ახალი მტაცებელი, ახალი კლუბი, ახალი გამოწვევა, კეთილი იყოს შენი მობრძანება ოცნებათა თეატრში", - დაწერა Adidas-მა თავიანთ გვერდზე, რომელიც რამდენიმე საათში წაშალა.
ჯერჯერობით გუნდებს განცხადება არ გაუკეთებიათ და პრესა მის მოლოდინშია.
საინტერესოა, რომ ფელიპე კოუტინიოს ტრანსფერის გაოფიციალურებამდე რამდენიმე დღით ადრე, ამერიკულმა ბრენდმა Nike-მა თავის ოფიციალურ გვერდზე ბრაზილიელი ფეხბურთელის "ბარსელონაში" გადასვლა დაადასტურა. შემდეგ კი ინფორმაცია წაშალა. საბოლოოდ კი ისინი მართლები აღმოჩნდნენ და კოუტინიო "კამპ ნოუზე" გადაბარგდა.
საინტერესოა განმეორდება, თუ არა იგივე პაულო დიბალას შემთხვევაში...