"რატომ წამოვიდა ბონუჩი "იუვედან"? "მთავარი მიზეზი ალეგრისთან..."

ლეონარდო ბონუჩის ტურინიდან "მილანში" გადაბარგებამ დიდი მითქმა-მოთქმა გამოიწვია. ვრცელდებოდა ბევრი ვერსია, თუ რატომ მოხდა ეს. საბოლოოდ, იტალიელმა მცველმა დუმილი დაარღვია და "იუვენტუსიდან" წასვლის მიზეზებზე ისაუბრა.

"მე პირდაპირი ადამიანი ვარ. ყველაფრის პირში თქმა მიყვარს", - ამბობს ბონუჩი.

"ხალხი ფიქრობს, რომ ჩემი წასვლა რაღაცამ გამოიწვია. ყველაფრის მთავარი მიზეზი ალეგრისთან თებერვალში მომხდარი კონფლიქტი იყო. ეს ჩემთვის მოთმინების ბოლო წვეთი აღმოჩნდა".

"საკუთარი თავის 100%-ით წარმოჩენისთვის მჭირდება, რომ გუნდში თავი საჭიროდ ვიგრძნო. "იუვეში" ასეთი რამ მხოლოდ მაშინ ხდება, როცა ჯანმრთელად ხარ და ძირითად შემადგენლობაში გამოდიხარ". - განაცხადა ბონუჩიმ.

შეგახსენებთ, რომ ლეონარდო ბონუჩის კონფლიქტი დანი ალვეშთანაც მოუვიდა. ჩემპიონთა ლიგის ფინალში, შესვენების დროს ფეხბურთელებს სერიოზული უთანხმოება ჰქონდათ, რის შემდეგაც მასიმილიანო ალეგრიმ ორივე მათგანის გუნდიდან გაშვება გადაწყვიტა.