ბასილაშვილმა მემფისის ტურნირის პირველი ნომერი ივო კარლოვიჩი დაამარცხა!
წარმატებულ სვლას აგრძელებს ქართველი ჩოგბურთელი ნიკოლოზ ბასილაშვილი, ვინაც სოფიიდან მემფისში გადაინაცვლა და იქაურ 250-იანთა კატეგორიის ტურნირზე ასპარეზობს.
ნიკოლოზმა დღეს გამთენიისას 1/8 ფინალური მატჩი ჩაატარა და ტურნირზე პირველ ნომრად განთესილი ივო კარლოვიჩი, 2 სეტში დაამარცხა.
ქართველი აშკარა უპირატესობას ფლობდა და მეტოქეს ერთადერთი ბრეიკ-პოინტი მისცა, რომელიც გამოუყენებელი დარჩა.
პირველი სეტი ტაიბრეიკამდე მივიდა, სადაც ბასილაშვილმა მოწინააღმდეგე 3 მინიბრეიკით, 7:2 დაჯაბნა და სეტებში წინ გავიდა, ხოლო მეორე პარტიაში ნიკამ მატჩის ერთადერთი ბრეიკი შეასრულა და თამაში საბოლოო გამარჯვებამდე მიიყვანა - 7:6 6:3.
24 წლის ქართველი, 1/4 ფინალში, ავსტრალიელ მეტიუ ებდენს შეხვდება, რომელიც ამჟამად მსოფლიო რეიტინგში 490-ე ადგილს იკავებს. შეხვედრა დღეს გვიან ღამით, 02:30 საათზეა ჩანიშნული.