რეგისტრაცია
"ბარსა", რომელმაც 2006 წლის "ჩემპიონთა ლიგა" მოიგო - სად არიან ის ფეხბურთელები ახლა?

ჯგუფურ ეტაპზე „ბარსამ“ ქულები მხოლოდ საბერძნეთში, „პანათინაიკოსთან“ მატჩისას დაკარგა - 0:0. გერმანულ „ვერდერსა“ და იტალიურ „უდინეზეს“ ფრანკ რაიკაარდის ბიჭებმა ორ-ორი თამაში მარტივად მოუგეს, ხოლო იმავე „პანათინაიკოსს“ „ნოუ კამპზე“ შავი დღე აყარეს და 5:0-ზე დაამარცხეს.

1/8 ფინალში გუნდის მეტოქე „ჩელსი“ გახდა. ლონდონში გამართული მატჩი ძალიან საინტერესო და ცოტა უცნაური გამოდგა. ჯერ 18 წლის ლეო მესიმ, „ლურჯების“ ესპანელი მარცხენა მცველი, ასიერ დელ ორნო მოედნიდან გააგდებინა, შემდეგ ტიაგო მოტამ და ჯონ ტერიმ ავტოგოლები გაიტანეს, ბოლოს კი სამუელ ეტოომ გამარჯვებისა დააჭედა - 2:1. კატალონიაში რონალდინიოს გვიანი გოლით „ბლაუგრანა“ იგებდა, თუმცა ლამპარდმა ბოლო წუთებზე გაათანაბრა.

ტურნირის შემდეგ სტადიაზე „ბარსამ“ პირველი მატჩი ლისაბონში, „და ლუჟზე“ ჩაატარა და „ბენფიკას“ უგოლოდ გაეყარა. საპასუხო შეხვედრის მე-19 წუთზე რონალდინიოს მასპინძლები წინ გაყავს, თუმცა „ნოუ კამპი“ ბოლო წუთებამდე ნერვიულობს - „ბენფიკას“ გოლის შემთხვევაში, 1/2 ფინალში პორტუგალიელები გადიან. ყველაფერი 89-ე წუთზე ეტოომ გაარკვია - 2:0.

შემდეგი გაჩერება „სან სიროა“, სადაც ნესტა-კალაძის ცენტრალური დაცვის დეუტმა, ერთ-ერთ ეპიზოდში, რონალდინიოს გენიას ვერაფერი მოუხერხა... ბრაზილიელის საოცარი პასით ლუდოვიკ ჟიულიმ შეხვედრის ერთადერთი გოლი გაიტანა და განმეორებითი მატჩის წინ, ესპანელებს საგრძნობი ჰანდიკაპი შეუქმნა. ესპანეთში წმინდა საფეხბურთო კუთხით ნაკლებად, მაგრამ სხვა მხრივ დასამახსოვრებელი მატჩი შედგა. კონრეტულად შეხვედრა 0:0 დასრულდა, თუმცა თამაშის მთავარმა მსაჯმა, გერმანელმა მარკუს მერკმა, იტალიელთა ფორვარდ ანდრეი შევჩენკოს წესების სრული დაცვით გატანილი გოლი არ ჩაუთვალა, რომელსაც ორმატჩიანი დაპირისპირება დამატებით დროში გადაყავდა. რამდენიმე დღეში მერკმა თავისი შეცდომა აღიარა და თქვა, რომ შევჩენკოს წესი არ დაურღვევია და შევცდიო, თუმცა ამით რა... „მილანი“ სახლში, „ბარსა“ - ფინალში...

არსენ ვენგერი, ტიერი ანრი და მათი „არსენალი“, რომელსაც „ჩემპიონთა ლიგის“ მოგების ისტორიული შანსი ჰქონდა. მატჩის მე-18 წუთზე ინგლისელებს მეკარე იენს ლემანი გაუძევეს და „ბარსას“ სერიოზული უპირატესობა მიეცა. მიუხედავად ამისა, ოციოდ წუთში, სტანდარტულისას, ინგლისის ბოლოდროინდელ ისტორიაში ერთ-ერთმა გამორჩეულმა მცველმა, სოლ კემპბელმა ბურთს თავი მადიანად დააჯახა და ვიქტორ ვალდესის კარის ბადე შეარხია. ტაიმი „არსენალმა“ 1:0 მოიგო. მეორეში „ბარსა“ უტევს, უტევს, მაგრამ ლემანის შემცვლელი ალმუნია, ყველაფერს იგერიებს... „მეთოფეებმა“ კარგა ხანს გაძლეს, თუმცა ბოლომდე ვერა... 76-ე წუთზე ჯერ სამუელ ეტოომ გაიტანა, ხოლო 5 წუთში ჟულიანო ბელეტიმ კარიერის უმნიშვნელოვანესი ბურთი შეაგდო და ინგლისისკენ მიბრუნებული თასი, ესპანეთის გზას გაუყენა.

ქვემოთ მოცემული ფოტოებით კი, შეგვიძლია გადავხედოთ სად და რას საქმიანობენ იმ გამარჯვების შემოქმედნი.

 

ვიქტორ ვალდესი - 34 წლისაა. პრემიერ ლიგის კლუბ „მიდლსბროს“ ძირითადი მეკარეა.

 

კარლეს პუიოლი (კაპიტანი) – 38 წლისაა. მარკ ბარტრას აგენტია. ასევე ეხმარება უპატრონო ცხოველებს.

 

რაფაელ მარკესი - 37 წლისაა. საფეხბურთო კარიერას მექსიკურ „ატლასსა“ და ამ ქვეყნის ნაკრებში აგრძელებს.

 

ოლეგერი - 36 წლისაა. მიიღო დიპლომი ეკონომიკის დარგში. აქტიურად უჭერს მხარს კატალონიის დამოუკიდებლობას.

 

ჯოვანი ვან ბრონხორსტი - 41 წლისაა. მეორე წელია ჰოლანდიური „ფეიენოორდის“ მთავარი მწვრთნელია.

 

სილვინიო - 42 წლისაა. ბრაზილიის ნაკრების მთავარი მწვრთნელის ასისტენტია.

 

ჟულიანო ბელეტი - 40 წლისაა. დააარსა საფეხბურთო კლუბი. ასევე ფლობს სამწვრთნელო ლიცენზიას. ამჟამად მუშაობს კომენტატორად.

 

მარკ ვან ბომელი - 39 წლისაა. საუდის არაბეთის ნაკრების მთავარი მწვრთნელის ასისტენტია.

 

ედმილსონი - 40 წლისაა. ერთ-ერთი ბრაზილიური არხის კომენტატორია.

 

 

ტიაგო მოტა - 34 წლისაა. კვლავ უმაღლეს დონეზე თამაშობს და ფრანგული „პსჟ“-ს ღირსებას იცავს.

 

გაბრი - 37 წლისაა. „ბარსელონას“ ერთ-ერთი ასაკობრივი გუნდის მწვრთნელია.

 

ხავი - 36 წლისაა. ყატარული კლუბის, „ალ-სადის“ რიგებში თამაშობს.

 

ანდრეს ინიესტა - 34 წლისაა. „ბარსელონას“ ლიდერი და კაპიტანია.

 

რონალდინიო - 36 წლისაა. კარიერა დაასრულა, თუმცა შესაძლოა გადაწყვეტილება შეცვალოს და „შაპეკოენსეს“ ფორმით ბურთი კვლავ გააგოროს.

 

დეკუ - 39 წლისაა. დაკავებულია ქველმოქმედებით. ბრაზილიაში გახსნა საკუთარი უნივერსიტეტი.

 

ლუდოვიკ ჟიული - 40 წლისაა. ტელეარხ „ბეინ სპორტსის“ ანალიტიკოსია. 2016 წლამდე თამაშობდა სამოყვარულო გუნდში.

 

ლიონელ მესი - 29 წლისაა. სად წავიდოდა?!

 

სამუელ ეტოო - 35 წლისაა. თურქეთის ჩემპიონატში „ანტალიასპორის“ რიგებში ირჯება.

 

ჰენრიკ ლარსონი - 45 წლისაა. 2016 წლის ნოემბრამდე, შვედური კლუბის, „ჰელსინგბორგის“ მთავარი მწვრთნელი იყო.

 

ფრანკ რაიკაარდი - 54 წლისაა. 3 წლით მწვრთნელობას თავი დაანება. ამჟამად თანამშრომლობს ფლორიდის აკადემიასთან.

 

ალბერტ ხორკერა (მეკარე) – 37 წლისაა. დაკავებულია იუველირული ბიზნესით.

მაქსი ლოპესი - 32 წლისაა. იტალიური „ტორინოს“ სათადარიგო ფორვარდია.

სანტიაგო ესკერო - 39 წლისაა. „ბარსელონას“ ვეტერანთა გუნდის წევრია. 

 

მოამზადა ირაკლი ფოფხაძემ


მოიწონე სტატია
გაუზიარე სტატია მეგობარს

კომენტარები
დამალვა

პრემიერლიგა
ლა ლიგა
ბუნდესლიგა
სერია-ა
ლიგა 1