ის დაბრუნდა! - ჯოკოვიჩმა ბოლო 25 თვეში პირველი დიდი სლემი მოიგო!
უიმბლდონის წლევანდელი გათამაშების მამაკაცთა თანრიგის ჩემპიონი ნოვაკ ჯოკოვიჩია, რომელმაც 1/2 ფინალში, რაფა ნადალს ეპიკური მატჩი მოუგო, გადამწტყვეტი დაპირისპირებისას კი კევინ ანდერსონს აჯობა.
2016 წლის როლან გაროსის შემდეგ, ჯოკოვიჩი დიდი სლემის ტურნირების ფინალში პირველად თამაშობდა, ხოლო მისი მოწინააღმდეგე ამ კატეგორიის გათამაშებათა ფინალში, საერთოდ მეორედ ასპარეზობდა - სამხრეთ აფრიკელმა გასული წლის ამერიკის ღია პირველობის ფინალი, რაფაელ ნადალთან დათმო.
"ნოლე" ანდერსონს ურთიერთშეხვედრებში 5:1-ზე ამარცხებდა, საბოლოოდ, ეს ტენდენცია გაგრძელდა და სერბმა მეტ-ნაკლებად იოლი გამარჯვება მოიპოვა.
თამაშის პირველ და მეორე სეტში ბრძოლა პრაქტიკულად არ ყოფილა და ორივე პარტია ჯოკოვიჩმა ერთნაირი ანგარიშით - 6:2 აიღო. ანდერსონს არაფერი გამოსდიოდა, მისი გამოცდილი ვიზავი კი ჩვეულად დამაჯერებელი გახლდათ და მეტოქის თამაშში არსებულ ხარვეზებს სათავისოდ იყენებდა.
Novak Djokovic saves two set points to even the third set at 5-5, giving the crowd a big 'Come On!'
— ATP World Tour (@ATPWorldTour) July 15, 2018
Will Kevin Anderson earn any more chances? ????
➡️ https://t.co/Isfm5bbYK2 pic.twitter.com/Lp5uUJWBAo
გიგანტმა აფრიკელმა თამაში მე-3 სეტში გამოასწორა, როცა საკუთარ მოწოდებებს თავისუფლად იგებდა, მეტოქისაზე კი არაერთი შანსი მიეცა, თუმცა... ჯოკოვიჩს ბრეიკ-პოინტი არ ჰქონია, ანდერსონს კი ჯამურად 6 ბრეიკ-პოინტი მიეცა, თანაც მათგან 5 ამავდროულად სეტ-პოინტი გახლდათ.
სერბმა საფრთხე გაანეიტრალა, საქმე ტაიბრეიკამდე მიიყვანა, იქ კი პრობლემა აღარ ჰქონია და მატჩი 3 სეტში დახურა - 6:2; 6:2; 7:6.
????????
— ATP World Tour (@ATPWorldTour) July 15, 2018
Leave a GIF with your reaction to Novak Djokovic's victory ⬇️ pic.twitter.com/UZNZ7zy6hy
გორან ივანიშევიჩის 2001 წლის ტრიუმფის შემდეგ, ჯოკოვიჩი უიმბლდონის ყველაზე დაბალრეიტინგიანი გამარჯვებულია. ივანიშევიჩი მაშინ მსოფლიოს 125-ე ჩოგანი იყო, ნოვაკი ამჟამად მე-12-ეა.
ნოვაკ ჯოკოვიჩმა უიმბლდონი მეოთხედ მოიგო, საერთო ჯამში კი მე-13 დიდი სლემის ტიტულს დაეუფლა. "ჯოკოს" 6-ჯერ ავსტრალიის ღია პირველობა, 4-ჯერ უიმბლდონი, 2-ჯერ ამერიკის ღია პირველობა და ერთხელ როლან გაროსი აქვს მოგებული.